Ағымдағы жылдың 8 қазанында Б. Майлин атындағы тарихи-өлкетану музейінде Б. Майлин атындағы мектеп оқушылары үшін құқықтық мәдениетті, азаматтық жауапкершілікті және заңдарға, құқықтарға, сондай-ақ айналадағы адамдардың жеке шекараларына құрметпен қарауды қалыптастыруға бағытталған «Құқықтар мен міндеттер: өз жолыңды тап» атты танымдық викторина-ойыны өткізілді.
Ойын барысында оқушылар азаматтардың құқықтары мен міндеттеріне қатысты сұрақтарға жауап беріп, түрлі өмірлік жағдайларды талдап, құқықтық білімдерін тәжірибеде қолдануды үйренді. Некеге дейінгі және кәмелетке толмағандардың құқықтарын сақтау, еңбек қатынастары, тұтынушылардың құқықтарын қорғау, цифрлық ортадағы қауіпсіз мінез-құлық, жеке деректерді қорғау және жеке шекараларды құрметтеу мәселелеріне ерекше назар аударылды. Командалық сайыс форматында оқушылар ұсынылған жағдайларды талқылап, дұрыс жауап нұсқаларын таңдады және Қазақстан Республикасының заңнамасы бойынша өз білімдерін тексерді.
Іс-шара жасөспірімдердің құқықтық сауаттылығын арттыруға және өз құқықтары мен міндеттеріне жауапкершілікпен қарауды қалыптастыруға ықпал етті.
