Ағымдағы жылдың 1 маусымында Б. Майлин атындағы тарихи-өлкетану музейі Балаларды қорғау күніне орай «Даймондс» би ұжымының жетістіктеріне арналған «Би ырғағында» атты фотоқұжаттық көрме ұйымдастырды.
Фотоқұжаттық көрме келушілерді ұжымның шығармашылық өміріндегі жарқын сәттермен: концерттік қойылымдармен, байқаулардағы жеңістермен, дайындық күндерімен және ансамбль қатысушыларының сахналық бейнелерімен таныстырады. Ұсынылған фотосуреттер мен грамоталар ұжымның қалыптасу жолын, оның жетістіктері мен балалар хореография өнерін дамытуға қосқан үлесін көрсетеді.
«DIAMONDS» хореографиялық ұжымының тарихы 2013 жылы басталды. Ансамблдің негізін қалаушысы, жетекшісі әрі хореографы — Орлова Евгения Александровна. Ол балаларды биге, шығармашылыққа және сахна өнеріне деген сүйіспеншілікке біріктіре білген талантты педагог. Бүгінгі таңда ұжымда 5 пен 14 жас аралығындағы 60-тан астам бала айналысады. Жұмыс үш жас ерекшелік тобында жүргізіледі: кіші, орта және үлкен топтар. Ансамблдің әрбір қатысушысы хореографиялық шеберлікті меңгеріп қана қоймай, тәртіпке, сахна мәдениетіне, өзара қолдау көрсетуге және жоғары нәтижелерге ұмтылуға үйренеді.
«DIAMONDS» ұжымы түрлі деңгейдегі байқаулар мен фестивальдерде аудан намысын белсенді түрде қорғап келеді. Шығармашылық қызмет жылдарында ансамбль «Таланты Казахстана», «Pro Танцы KZ», «DANCE MANIA», «ZHAS SHABYT», «Искусство — наследие культур» және басқа да көптеген халықаралық байқаулардың лауреаты атанып, Гран-при жүлделерін жеңіп алды. Жас бишілер Қостанай, Алматы, Астана, Ташкент қалаларында және Түркияда өткен республикалық және халықаралық чемпионаттарда лайықты өнер көрсетті.
Кәсіби шеберліктің жоғары деңгейде танылуының дәлелі ретінде 2024 жылы ұжымға «Үлгілі ансамбль» құрметті атағы берілді. Мәдениет пен өнерді дамытуға қосқан елеулі үлесі үшін «Даймондс» би ұжымы мен оның жетекшісі Евгения Орлова бірнеше рет құрмет грамоталарымен, алғыс хаттармен және ақшалай сертификаттармен марапатталды.
«DIAMONDS» ұжымы әр баланың шығармашылық әлеуетін ашып, жас әртістердің жаңа буынын би өнеріне деген сүйіспеншілікке шабыттандыра отырып, белсенді дамуын жалғастыруда.
